Ձգվող առաստաղների խնամք

Եվ այսպես, տունը վերանորոգել ենք, տեղադրել ենք ձգվող առաստաղներ ու վայելում ենք տան մաքրությունը: Որոշ ժամանակ անց, սակայն, սկսում ենք մտածել ձգվող առաստաղները մաքրությունը պահպանելու ուղղությամբ: Սովորաբար ձգվող առաստաղների արտաքին թաղանթը պատված է լինում հատուկ հակաստատիկ նյութով, ինչի շնորհիվ ձգվող առաստաղները փոշի չեն վերցնում: Սակայն տան տարբեր մասերում աղտոտման մակարդակը տարբեր է, և միևնույնն է, առաջ են գալիս հարցեր՝ ինչպե՞ս մաքրել ձգվող առաստաղները, կարելի՞ է արդյոք լվանալ, թե՞ հատուկ նյութեր են անհրաժեշտ մաքրման համար:

Եվ այսպես, առաստաղների մաքրման համար թույլատրելի են հետևյալ եղանակները՝

• Չոր մաքրում. մաքրման այս եղանակն իրականացվում է փոշեկուլով կամ փափուկ, խավավոր լաթով՝ հեռացնելով փոշին ու սարդոստայնները: Պետք է նկատի ունենալ, որ այս դեպքում ավելի գործածությունը նպատակահարմար չէ:

• Թաց մաքրում՝ խոնավ սպունգով կամ ֆլանելե լաթով: Առաստաղի վրա ճարպոտ շերտի առկայության դեպքում ջրին կարելի է ավելացնել մաքրող նյութեր՝ հեղուկ օճառ, սպասք լվանալու հեղուկ, պոլիրոլ կամ ձգվող առաստաղների համար նախատեսված հատուկ բաղադրություն:

Մաքրման եղանակի ընտրությունը կախված է առաստաղի աղտոտվածության աստիճանից, ինչպես նաև առաստաղի տեսակից: 

• ՊՎՔ կամ գործվածքե փայլատ առաստաղների մաքրման համար բավական է փոշեկուլով չոր մաքրումը:

• Փայլուն առաստաղները մաքրում են չոր անձեռոցիկով, անուշադրի սպիրտի 10% լուծույթով կամ նոսր օճառաջրով: Փայլուն առաստաղների դեպքում չի թույլատրվում կերոսին, լուծիչներ կամ ացետոն պարունակող միջոցների գործածումը:

Սենյակների շահագործման պայմաններից ելնելով՝ տարբեր է լինում աղտոտվածության մակարդակը, ինչից ելնելով էլ ընտրում ենք մաքրման այս կամ այն եղանակը:

Հյուրասենյակի և ննջարանների առաստաղները սովորաբար չեն կեղտոտվում, պարզապես ժամանակի ընթացքում փոշին և սարդոստայնները մաքրելու անհրաժեշտություն է առաջանում: Այս դեպքում մաքրման իդեալական եղանակ կարելի է համարել չոր մաքրումը՝ փոշեկուլով, չոր լաթով կամ փափուկ խոզանակով:

Խոհանոցի առաստաղներն ամենից շատ են աղտոտվում, և անխուսափելի է ճարպոտ շերտի առաջացումը: Խոհանոցի ձգվող առաստաղները պետք է լվանալ սովորական ջրով՝ ավելացնելով որևէ լվացող նյութ (հեղուկ օճառ կամ սպասք լվանալու հեղուկ):

Օգտակար խորհուրդներ ձգվող առաստաղների ճիշտ խնամքի համար

• Փոշեկուլով չոր մաքրման ժամանակ պետք է ուշադիր լինել փոշեկուլի խոզանակի ընտրության հարցում: Վերջինս պետք է փափուկ լինի, որպեսզի չքերծի առաստաղը:

• Գործվածքից պատրաստված ձգվող առաստաղների չոր մաքրման նպատակով ավելի լավ է օգտագործել փափուկ մազիկներով խոզանակ:

• Խոնավ մաքրման համար պետք է ընտրել այնպիսի լաթ, որը մազմզուկներ չի թողնում մակերևույթների վրա:

• Խոնավ մաքրման համար չի թույլատրվում օգտագործել կերոսին, լուծիչներ կամ ացետոն:

• Փայլատ առաստաղների վրա հայտնված փոքրիկ բծերը կարելի է մաքրել նույնիսկ սովորական ռետինով:

• Ֆոտոպրինտով ՊՎՔ առաստաղների մաքրման համար չի կարելի օգտագործել սպիրտային լուծույթներ, քանի որ ներկը կարող է մաքրվել: